日本男星山崎賢人成功走紅影視界,由佢孭飛嘅作品一套接一套,而且更為多套青春愛情片擔任男主角,自然成為少女心目中嘅最佳對象,連18歲當紅偶像廣瀨鈴都對佢好感度爆燈,仲傳出廣瀨鈴做第三者,介入山崎賢人同土屋太鳳之間橫刀奪愛!
剛剛度過22歲牛一嘅山崎賢人,兩年來跟土屋太鳳先後兩度演情侶角色,之後被雜誌《週刊文春》拍得私下密會,繼而令地下情曝光。山崎賢人與土屋太鳳各有各忙,目前男方忙於宣傳改編少女漫畫嘅新片《四月是你的謊言》,拍住廣瀨鈴做銀幕情侶,近月來出雙入對,趁電影開畫當天,鈴妹向山崎賢人送上生日蛋糕,兩人日前齊齊上綜藝節目時,鈴妹全程黐實山崎賢人,兩人身貼身坐可謂零距離,加上鈴妹最近偕土屋出席一同代言嘅朱古力記者會,佢當住情敵面前話理想男友要有下巴,有人認為好勝嘅鈴妹正正係講緊輪廓分明嘅山崎賢人,擺明向土屋宣戰。... |